5 ნოე. 2025
ბათუმის საერთაშორისო თოჯინების თეატრალური ფესტივალი BIPTF 2025 - ოფიციალურად გაიხსნა და 10 ნოემბერს დაჯილდოების ცერემონიალით დაიხურება. ფესტივალი ბათუმის თოჯინებისა და მოზარდ მაყურებელთა პროფესიულმა სახელმწიფო თეატრმა სპექტაკლით „პლატონი“ გახსნა.
გახსნის ღონისძიებას ესწრებოდნენ აჭარის კულტურის სამინისტროს, თეატრალური საზოგადოების წარმომადგენლები, ფესტივალის მონაწილეები და მოწვეული სტუმრები.
ღონისძიების ორგანიზატორებსა და მონაწილეებს აჭარის კულტურის მინისტრის მოადგილემ, ლადო მგალობლიშვილმა წარმატებები უსურვა და აღნიშნა, რომ მსგავსი ფესტივალები ხელს უწყობენ კულტურული გარემოს გამრავალფეროვნებას და რეგიონის პოპულარიზაციას.
ფესტივალის პროგრამა მოიცავს - თეატრალურ წარმოდგენებს, მასტერკლასებსა და შემოქმედებით შეხვედრებს მოწვეული საერთაშორისო სპეციალისტების მონაწილეობით. ფესტივალში მონაწილეობენ საფრანგეთის, ჩეხეთის, მოლდოვას, თურქეთის და უზბეკეთის თეატრალური დასები.
ბათუმის საერთაშორისო თოჯინების თეატრალური ფესტივალი ყოველწლიურად იმართება და მიზნად ისახავს საქართველოში თოჯინური თეატრის განვითარების ხელშეწყობას, საერთაშორისო შემოქმედებითი კავშირების გაძლიერებას და ქართული თოჯინური ხელოვნების პოპულარიზაციას საერთაშორისო დონეზე.